Monopoli i ri zëvendëson paratë me një aplikacion

Në muajin gusht, gjiganti i lodrave Hasbro do të lançojë një version të ri të lojës Monopoli, raportojnë mediat ndërkombëtare. Ndryshimi kryesor është se askush nuk do të ketë më rolin e “bankierit”, pasi një aplikacion mobil do të menaxhojë paratë dhe pronat e lojtarëve.

Qëllimi i këtij ndryshimi është të përshpejtojë lojën dhe ta bëjë më të lehtë për fëmijët. Megjithatë, lajmi ka shkaktuar reagime të forta, shkruan New York Post.

– Le të marrim një lojë që tashmë është 90% fat dhe të heqim pjesën e vetme argëtuese: menaxhimin e parave!, – u ankua një person.

Një tjetër kritikoi vendimin duke thënë se qëllimi kryesor i këtyre lojërave është t’u mësojë fëmijëve matematikën dhe si të menaxhojnë e të llogarisin paratë.