BE-ja propozon listën e parë të “vendeve të treta të sigurta” për kthimin e azilkërkuesve, mes tyre dhe Kosova.

Komisioni Evropian është duke përgatitur një propozim për të përcaktuar shtatë vende si “vende të treta të sigurta” ku mund të rikthehen azilkërkuesit që nuk përfitojnë mbrojtje ndërkombëtare në Bashkimin Evropian. Lajmi është raportuar nga faqja e njohur e lajmeve Euractiv, e cila ka siguruar një dokument të brendshëm të Komisionit.

Lista e vendeve të propozuara përfshin: Bangladeshin, Kolumbinë, Egjiptin, Indinë, Kosovën, Marokun dhe Tunizinë. Lista përfundimtare pritet të publikohet zyrtarisht para muajit qershor.

Sipas dokumentit, qëllimi i kësaj mase është të përshpejtohet dhe të bëhet më efikas procesi i kthimit të personave që nuk përmbushin kriteret për azil në vendet e BE-së. Me hyrjen në fuqi të kësaj liste, azilkërkuesit do të mund të transferohen në vendet e treta të sigurta për të kërkuar mbrojtje atje, në vend që të qëndrojnë në shtetet anëtare gjatë gjithë procesit të shqyrtimit të kërkesave.

Lista do të përfshihet nga një rregullore e re që është pjesë e Paketës për Azil dhe emigracion, e miratuar nga BE vitin e kaluar dhe që pritet të hyjë në fuqi në vitin 2026.

Përveç kësaj, në muajin mars, Komisioni Evropian ka propozuar edhe rregulla të reja detyruese për kthimin e emigrantëve, të cilat po diskutohen aktualisht nga shtetet anëtare dhe Parlamenti Evropian.

Ky zhvillim pritet të sjellë debat të gjerë politik dhe ligjor për sa i përket të drejtave të njeriut, sigurisë në vendet e treta dhe përgjegjësive që kanë shtetet anëtare ndaj të drejtave të azilkërkuesve.

Burimi: Aftonbladet