Gjykata e Lartë britanike: Oatly nuk mund ta quajë më produktin e saj “qumësht”

Gjykata e Lartë në Mbretërinë e Bashkuar ka vendosur se qumështi i tërshërës i kompanisë Oatly nuk mund të quhet më “qumësht”, raportoi Sky News.

Çështja nisi pasi organizata e industrisë së bulmetit, Dairy UK, kundërshtoi përpjekjen e Oatly në vitin 2021 për të regjistruar një markë tregtare me shprehjen “generationen efter mjölken” (“brezi pas qumështit”). Sipas Dairy UK, përdorimi i fjalës “qumësht” për një produkt që nuk vjen nga kafshët bie ndesh me ligjin.

Pas shqyrtimit të rastit, Gjykata e Lartë vendosi në favor të Dairy UK, duke i dhënë të drejtë argumentit të tyre.

“Parimi bazë është i thjeshtë: nëse një produkt nuk vjen nga qumështi i kafshëve, ai nuk mund të tregtohet me emërtime të mbrojtura të produkteve të bulmetit si ‘qumësht’ apo ‘djathë’”, deklaroi për Sky News avokati Richard May në lidhje me vendimin.

Vendimi pritet të ndikojë në mënyrën se si produktet me bazë bimore emërtohen dhe tregtohen në Mbretërinë e Bashkuar.

Burimi: Sky News