Afro 5,000 persona rrezikojnë dëbimin nga Suedia – Ndryshimi i ligjit hyn në fuqi më 1 Prill

Suedia po përballet me një valë të madhe dëbimesh, pasi parlamenti vendosi të ndalojë praktikën e njohur si “ndryshimi i drejtimit”. Ky ligj i mëparshëm lejonte personat që kishin marrë refuzim për kërkesat e tyre për azil të aplikonin për leje pune pa u larguar nga vendi.

Sipas raportimeve nga Dagens Nyheter (DN), vendimi i ri do të hyjë në fuqi më 1 prill, duke bërë që afërsisht 5,000 persona të rrezikojnë dëbimin nga Suedia.

“Shumë pak ndryshime ligjore të kësaj natyre hyjnë në fuqi me më pak se një muaj paralajmërim,” tha Hanna Geurtsen nga Agjencia e Migracionit, duke shprehur shqetësimin për efektet e menjëhershme të këtij ligji.

Më parë, azilkërkuesit kishin mundësinë të kërkonin leje pune brenda Suedisë, por ministri i Migracionit, Johan Forssell (M), e ka quajtur këtë praktikë një “sistem trajtimi të veçantë”. Ai ka theksuar se azilkërkuesit duhet të aplikojnë për leje pune nga vendet e tyre të origjinës, duke e konsideruar këtë qasje si më të drejtë dhe më të rregullt.

Praktika e “ndryshimit të drejtimit” kishte si qëllim të krijonte mundësi për integrimin e personave që tashmë kishin ndërtuar një jetë në Suedi përmes punësimit. Megjithatë, me ligjin e ri në prag të zbatimit, mijëra njerëz përballen me pasiguri të madhe për të ardhmen e tyre.

Ekspertët parashikojnë se ky ndryshim mund të ketë ndikime sociale dhe ekonomike për Suedinë, ndërkohë që mijëra individë përgatiten të përballen me dëbimin e detyruar.

Ligji nga zyra e Emigracionit:

https://www.migrationsverket.se/nyhetsarkiv/nyhetsarkiv/2025-03-13-sparbyte-avskaffas-och-andrade-regler-for-preskriptionstid.html