Agjencia e Emigracionit në Suedi Nuk Apelon Vendimin për punetoret Tajlandezë

Agjencia e Migracionit në Suedi ka vendosur të mos apelojë vendimin e Gjykatës së Migracionit të datës 26 qershor, i cili riktheu për shqyrtim mbi 1,200 raste të punëtorëve tajlandezë të cilët kërkuan leje për mbledhjen e frutave. Ky vendim erdhi pasi punëdhënësit paraqitën informacione të reja që adresonin mangësitë në kushtet e punës.

Në fillim të qershorit, Agjencia e Migracionit refuzoi kërkesat pas forcimit të kontrolleve mbi kompanitë e stafit tajlandez dhe angazhimet e tyre si punëdhënës, për shkak të indikacioneve të abuzimit në kete industri. Megjithatë, pas refuzimeve, punëdhënësit paraqitën informacione të reja që shpjegonin masat që do të merrnin për përmirësimin e kushteve të punës.

Anna Lindblad, zëvendës shefja juridike e Agjencisë së Migracionit, deklaroi: “Ne dhe Gjykata e Migracionit jemi dakord se ka pasur mangësi të mëparshme tek dy punëdhënësit, por gjykata i ka gjetur shpjegimet e reja të pranueshme. Gjykata vendosi se hetimi i përgjithshëm nuk ofroi prova të mjaftueshme për të mbështetur qëndrimin tonë se punëdhënësit nuk do të përmbushnin kushtet e punës në përputhje me marrëveshjet kolektive apo praktikat e industrisë.”

Vendimi i gjykatës konsideron që hetimi i bërë nga agjencia nuk dha prova të mjaftueshme për të justifikuar refuzimin e kërkesave. Gjykata gjeti se punëdhënësit ofruan shpjegime të pranueshme për përmirësimin e kushteve të punës, duke e bërë të nevojshme rikthimin e rasteve për shqyrtim të mëtejshëm.

Agjencia e Migracionit e sheh pozitivisht që kontrollet e tyre kanë çuar në masa konkrete nga punëdhënësit për të përmirësuar kushtet e punës për punëtorët. Tani, kërkesat do të shqyrtohen përsëri në përputhje me vendimin e Gjykatës së Migracionit. Agjencia do të vazhdojë të monitorojë punëdhënësit në industrinë e frutave përmes inspektimeve të mëtejshme dhe në bashkëpunim me autoritetet e tjera për të luftuar krimet në vendin e punës.