Biden dënon ashpër sulmet ruse në Ukrainë. Ai zotohet për përforcime të mbrojtjes së Ukrainës, gjatë samitit të Nato-s./ Rusia: Do të ndjekim me vëmendjen më të madhe samitin

Presidenti i SHBA, Joe Biden, dënoi sulmet raketore ruse të hënën në Ukrainë, ku mbetën të vrarë më shumë se 35 persona.

Biden e cilësoi brutalitet rus, teksa u zotua se do ta forcojë mbrojtjen ajrore të Kievit.

Shënjestër e sulmeve ruse ishte edhe një spital për fëmijë, ku mbetën të vrarë dy punonjës. Kryetari i Kievit, Vitali Klitschko, e shpalli 9 korrikun ditë zie, pas sulmeve vdekjeprurëse në kryeqytet dhe rrethina.

Biden tha se përforcimet e mëtejshme për mbrojtjen ajrore të Ukrainës, do të shpallen gjatë Samitit të NATO-s që nis punimet sot në Uashington.

Nga ana tjetër, Rusia është shprehur se do ta ndjekë me vëmendjen më të madhe Samitin e NATO-s.

Udhëheqës nga 32 shtetet anëtare të NATO-s, vendet e tyre partnere dhe BE-ja do të mblidhen për të shënuar 75-vjetorin e aleancës. Pritet që edhe presidenti i Ukrainës, Volodymyr Zelensky, të jetë i pranishëm.