Çmimi i vajit të ullirit mund të përgjysmohet

Tregu ndërkombëtar. Çmimi i vajit të ullirit pritet të pësojë një ulje të ndjeshme gjatë muajve të ardhshëm, sipas parashikimeve nga prodhuesi më i madh në botë, kompania spanjolle Deoleo. Sipas raportimit të CNBC, çmimi mund të përgjysmohet nëse kushtet klimatike mbeten të favorshme.

Miguel Ángel Guzmán, drejtori i shitjeve në Deoleo, thekson se pas disa viteve të vështira me mot ekstrem dhe thatësira, këtë vit situata duket premtuese. “Nëse kjo tendencë pozitive vazhdon, çmimet e vajit të ullirit do të bien me shpejtësi,” tha ai.

Rënia e çmimeve tashmë ka filluar

Sipas të dhënave të CNBC, çmimi i vajit të ullirit është ulur me 19% vetëm gjatë muajit të fundit dhe me 35% nga kulmi i arritur në janar. Ky është një lajm i mirëpritur për konsumatorët dhe industrinë ushqimore, e cila është prekur nga rritja e çmimeve në vitet e fundit.

Ndërsa tregu po përgatitet për një periudhë më të qëndrueshme, ekspertët e industrisë po monitorojnë nga afër të korrat dhe ndikimin e tyre në furnizimin global. Për momentin, të gjitha sinjalet tregojnë një kthesë pozitive për çmimin e vajit të ullirit.