Dhjetëra të vrarë nga sulmet ruse në Ukrainë

Të paktën 41 persona kanë vdekur dhe rreth 180 të tjerë janë plagosur si pasojë e sulmeve ruse me raketa balistike në Ukrainë. Sulmet ruse goditën një strukturë arsimore dhe spital në rajonin qendror-lindor të Ukrainës, në qytetin Poltava. Ky duket të jetë një nga goditjet më vdekjeprurëse të kryera nga forcat ruse që kur ka nisur lufta në shkurt të 2022. Presidenti ukrainas, Zelenski ka reaguar duke thënë se: “Një nga ndërtesat e Institutit të Komunikacioneve u shkatërrua pjesërisht. Njerëzit e gjetën veten nën rrënoja. Të gjitha shërbimet e nevojshme janë përfshirë në operacionin e shpëtimit,” shtoi ai. Zelenski tha se kishte urdhëruar “një hetim të plotë dhe të shpejtë” mbi atë që ndodhi. Poltava ndodhet rreth 110 kilometra nga kufiri me Rusinë dhe rreth 350 kilometra në juglindje të Kievit.