Disa ton fileto pule me “salmonelë” janë futur në Shqipëri

Një sasi e konsiderueshme mish pule e importuar nga Brazili, të infektuara me bakterin e “salmonelës” janë futur në Shqipëri. Autoriteti Kombëtar i Ushqimit njoftoi se ngarkesa është identifikuar në Portin e Durrësit. Ende nuk dihet saktë sa është sasia fikse e mishit të pulës së nxjerrë në treg për shitje, si dhe konsumimit të tij. Në bazë të të dhënave nga media të ndryshme vendore, dyshohet për sasi nga 18 deri në 27 ton mish pule i importuar. Një kompani private shqiptare ka importuar produktin ushqimor nga Brazili me prani të bakterit të salmonelës. Policia ka shpallur në kërkim administratorin e kompanisë, ndërsa ka proceduar penalisht vëllain e tij për veprën penale ““Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”, si dhe tre inspektorë të Autoritetit Kombëtar të Ushqimit, për veprën penale “Shpërdorimi i detyrës”. Materialet procedurale i kaluan Prokurorisë Tiranë, për veprime të mëtejshme.