Frika nga lufta, Gjermania drejt rikthimit të shërbimit të detyrueshëm ushtarak

Pas ambicieve luftarake të Kremlinit, Ministri gjerman i Mbrojtjes, Boris Pistorius, po mendon rekrutimin e detyrueshëm për të gjithë 18-vjeçarët. Përveç burrave, ministria gjermane po mendon të rekrutojë gra për të rritur numrin e forcave të armatosura. Ekspertët ushtarakë në Berlin janë në fazat përfundimtare të diskutimit të tre opsioneve, dy prej të cilave përfshijnë një formë të rekrutimit. Siç u zbulua në mediat gjermane, Ministri gjerman i mbrojtjes do të publikojë planet përfundimtare deri në qershor. Ndër opsionet që ai ka vënë për diskutim është kjo: që Gjermania të rikthejë shërbimin e detyrueshëm ushtarak njëvjeçar për burrat pas moshës madhore, i cili ishte në fuqi deri në vitin 2011. Një tjetër opsion do të zbatohej vetëm për burrat e moshës 18 vjeç, por jo për të gjithë. Fillimisht, 18-vjeçarët do të duhej të plotësonin një formular online dhe më pas të zgjidheshin për rekrutim, sipas informacioneve të zbuluara në gazetën Die Welt. Opsioni i tretë do të shmangte shërbimin e detyrueshëm ushtarak, duke u fokusuar në “optimizimin” e sistemit aktual duke u angazhuar në fushata më proaktive rekrutimi.Nga ana e tij, Berlini ka vendosur gjithashtu një objektiv për të rritur numrin e forcave të tij të armatosura nga rreth 180,000 sot në më shumë se 200,000.