Kryenegociatorët e Kosovës dhe të Serbisë takohen sot në Bruksel

Kryenegociatorët e Kosovës dhe të Serbisë, Besnik Bislimi dhe Petar Petkoviq, takohen sot në Bruksel, në kuadër të dialogut për normalizimin e marrëdhënieve, të ndërmjetësuar nga Bashkimi Evropian. Zëdhënësi i BE-së, Peter Stano, paralajmëroi se në krye të agjendës së diskutimeve do të jetë zbatimi urgjent i Marrëveshjes për rrugën e normalizimit të marrëdhënieve. Gjithashtu, shefi i diplomacisë evropiane Zhozep Borrell ka kërkuar guxim, vizion dhe vullnet politik të liderëve. Sipas tij, pritjet e BE-së dhe vendeve anëtare nuk do të ndryshojnë. Detyrimet Kosovë-Serbi nuk do të zhduken. Pritjet që Bislimi dhe Petkoviq të dakordohen, nuk janë të mëdha. Disa raunde bisedimesh mes tyre për ndalimin e dinarit serb në Kosovë, përfunduan në maj pa ndonjë marrëveshje. Javën e kaluar në Bruksel dështuan përpjekjet e BE-së për një takim trepalësh me kryeministrin, Kurti dhe presidentin e Serbisë, Vuçiq.