Ligj i ri për apartamentet në pronësi të qiramarrësve, pritet të hyjë në fuqi më 1 janar 2027.

Qeveria do t’u japë shoqatave të apartamenteve në pronësi të qiramarrësve (BRF) më shumë mundësi për të ndërhyrë kundër anëtarëve që nuk sillen mirë ose që kanë të kaluar kriminale.

Në verën e vitit 2025, u caktua një hetim për të shqyrtuar mënyrat se si BRF-të mund të refuzojnë bashkëpronës të rinj ose të përjashtojnë ata që kryejnë apo kanë kryer krime. Qëllimi është të rritet siguria brenda ndërtesave dhe në zonat përreth tyre.

Ky rregullim i ri është në vijimësi me ndryshimet ligjore të bëra në vitin 2024 për sigurimin e rritur në ndërtesat me qira. Tani propozohet që parimet e reja të zbatohen edhe për apartamentet në pronësi të qiramarrësve.

Ligji i Qirasë 2024, çfarë ndryshoi?

Ligji i Qirasë u ndryshua në janar 2024. Ndryshimet kryesore ishin:

• Qiramarrësi duhet jo vetëm të ruajë rendin dhe higjienën, por edhe të kontribuojë në sigurinë e pronës.
• Qiradhënësi ka mundësi më të lehtë të ndërpresë kontratën në raste të shqetësimeve serioze ose veprimtarisë kriminale, pa detyrimin e paralajmërimit paraprak.
•  Rregulla më të rrepta mbi numrin e personave dhe mbi atë se kush lejohet të banojë në apartament.

Propozimi i ri për apartamentet në pronësi të qiramarrësve

Hetimi tashmë ka përfunduar dhe propozon:

• Mundësia për të ndërprerë kontratën e apartamentit rritet edhe kur krimet kryhen më larg nga ndërtesa sesa lejohet aktualisht.
• Pragu për ndërprerjen e kontratës kur apartamenti përdoret për aktivitet kriminal ulet.
• Përgjegjësia e pronarit të apartamentit për sigurinë në ndërtesë shtrëngohet.
• Mundësitë për të mohuar anëtarësimin në një shoqatë banesash kur personi ka kryer krime sqarohen dhe forcohen.

Ndryshimet ligjore propozohet të hyjnë në fuqi më 1 janar 2027.

Burimi: Nyheter24

Përgatitur nga stafi Informacione për Suedin