Partia Laburiste me fitore të thellë në Britani. Sunak pranon humbjen

Partia Laburiste ka arritur fitore të thellë në zgjedhjet parlamentare në Britaninë e Madhe duke i dhënë fund qeverisjes 14-vjeçare të Partisë Konservatore. Laburistët majtistë fituan shumicën dërrmuese të ulëseve në Parlament, teksa Partia Konservatore e Rishi Sunakut pësoi disfatën më të rëndë në historinë e vet. Keir Starmer u zotua se do të sjellë ndryshime në Britani si kryeministri i ardhshëm i vendit. Gjatë fjalimit, ai tha se “ndryshimi fillon tani”. Nga ana tjetër, Sunak pranoi humbjen dhe tha se i ka telefonuar Starmerit për ta uruar për fitoren. Njëkohësisht, Sunak e mori përgjegjësinë për disfatën e partisë së tij dhe kërkoi falje. Sunak do t’ia paraqesë zyrtarisht dorëheqjen mbretit, gjatë pasdites. Starmer, si udhëheqës i partisë fituese, do të takohet më pas me mbretin, të cilit do t’i kërkojë formimin e Qeverisë.

Më pas, kryeministri i ardhshëm zakonisht shkon në Doëning Street për ta mbajtur një fjalim para publikut. Gjatë ditëve në vijim, udhëheqësi i ri do ta fillojë emërimin e ministrave të Qeverisë, duke filluar nga postet e larta dhe duke kaluar në role me më pak përgjegjësi. Parlamenti pritet ta rinisë punën më 9 korrik. Kryetari i Dhomës së Ulët të Parlamentit do të zgjidhet nga radhët e deputetëve të Parlamentit. Secili deputet më pas do ta bëjë betimin për besnikëri ndaj mbretit ose do ta bëjë një pohim solemn. Kjo procedurë zakonisht zgjat disa ditë. Hapja e Parlamentit dhe Fjalimi i Mbretit, që përcakton programin e legjislacionit të Qeverisë për seancën parlamentare, priten më 17 korrik, megjithëse kjo datë mund të ndryshohet nga Qeveria e ardhshme.

Britania ka përjetuar disa vite të trazuara pjesërisht për fajin e konservatorëve, që kanë shkaktuar pesimizëm në mesin e shumë votuesve për të ardhmen e vendit të tyre. Dalja e Mbretërisë së Bashkuar nga Bashkimi Evropian, pasuar nga pandemia e COVID-19 dhe pushtimi rus i Ukrainës i dhanë goditje të rënda ekonomisë, ndërsa festat që shpërfillën rregullat e izolimit, të organizuara nga kryeministri i atëhershëm Boris Johnson dhe stafi i tij, shkaktuan zemërim të gjerë. Pasardhësja e Johnsonit, Liz Truss, tronditi ekonominë edhe më tej me një pako shkurtimesh drastike të taksave, dhe qëndroi vetëm 49 ditë në detyrë. Sunak, i cili e zëvendësoi Trussin, më pak se dy vjet më parë, shpalli zgjedhjet e 4 korrikut pavarësisht sondazheve që parashihnin humbje të partisë së tij.