Pas stuhisë diellore, dritat e veriut mrekulli në qiell

Aurora boreale ndriçuan qiellin në një pjesë të kontinentit europian, duke krijuar skena mahnitëse që rrallë shihen në këto zona të tij. Dritat e veriut, sikurse njihen ndryshe, u panë mbi Britaninë e Madhe, Gjermaninë, Zvicrën dhe shumë vende të tjera. Një fenomen jo dhe aq i pazakontë ky, sipas ekspertëve të NOAA-s, Administrata Kombëtare Oqeanike dhe Atmosferike e SHBA-së.  Aurora krijohet kur elektronet e erës diellore përplasen me atomet e shtresave të sipërme të atmosferës në një lartësi prej 80-150 km. Në hemisferën veriore, shumica e këtij aktiviteti zhvillohet brenda një brezi të njohur si aurora ovale, e cila mbulon gjerësi gjeografike midis 60 dhe 75 gradë.

Është e gjitha pjesë e aktivitetit diellor që rritet ndërsa Dielli i afrohet pikut të ciklit të tij 11-vjeçar, thotë “The Guardian”. Aktivitete të tilla në qiell, nga sa shpjegoi dhe NASA, nuk përbënin një kërcënim serioz për shtatë astronautët në Stacionin Ndërkombëtar të Hapësirës. Shqetësimi më i madh ishte rritja e niveleve të rrezatimit dhe ekuipazhi mund të lëvizte në një pjesë më të mbrojtur të stacionit nëse ishte e nevojshme, theksuan drejtues të saj. Sipas NOAA-s, dritat në qiell janë parë deri në Alabama dhe në veri të Kalifornisë.