Qeveria dhe SD synojnë të rrisin ndjeshëm ndihmën për riatdhesim deri në 350,000 korona për person.

Qeveria suedeze, dhe Partia Demokratët e Suedisë (SD), ka propozuar një rritje të ndjeshme të ndihmës për riatdhesim për emigrantët që zgjedhin të kthehen në vendet e tyre të origjinës. Masa është pjesë e një serie veprimesh që synojnë forcimin e politikës së emigracionit, njoftuan partitë në një konferencë për shtyp. Sipas planit të propozuar, ndihma maksimale do të arrijë deri në 350,000 korona për person, dhe pritet të hyjë në fuqi në vitin 2026.

Përkrahësit e masës argumentojnë se rritja e ndihmës do të inkurajojë më shumë individë të largohen vullnetarisht nga Suedia dhe të rikthehen në vendet e tyre. Megjithatë, plani ka hasur në kundërshtime nga ekspertë dhe zyrtarë qeveritarë. Joakim Ruist, hetues i qeverisë dhe ekspert në çështjet e migracionit, e ka kritikuar ashpër propozimin. Ai e ka cilësuar atë si të paefektshëm, duke deklaruar se ndikimi i tij do të jetë “minimal” dhe se shumë pak njerëz do të zgjedhin të përfitojnë nga ndihma.

Ministri i Migracionit: “Rreziqet ekzistojnë, por duhet të veprojmë”

Ministri i Migracionit, Johan Forsell, pranoi gjatë konferencës për shtyp se është e paqartë sa persona do të përfitojnë nga rritja e ndihmës për riatdhesim. “Ka rreziqe me këtë masë, por gjithashtu ekzistojnë rreziqe të mëdha nëse nuk bëjmë asgjë,” tha Forsell, duke argumentuar se pasiviteti do të sjellë probleme të tjera në politikën e emigracionit.

Sipas parashikimeve të qeverisë, fondi për ndihmën e riatdhesimit do të arrijë në 2.559 miliardë korona në vitin 2026 dhe në 1.357 miliardë në vitin 2027. Këto shifra përfshijnë jo vetëm ndihmën për riatdhesim, por edhe masa të tjera që synojnë forcimin e sistemit të kontrollit të emigracionit. Një nga masat shtesë është rritja e numrit të vendeve në qendrat e paraburgimit në Suedi, për të përballuar fluksin e emigrantëve që janë në pritje të dëbimit.

Reagime të ndyshme.

Propozimi ka ngjallur diskutime të gjera në politikën suedeze. Ndërsa disa e shohin si një hap të nevojshëm për të forcuar kontrollin e emigracionit, të tjerët e shohin masën si një zgjidhje jopraktike që nuk adreson rrënjët e problemeve të integrimit dhe emigracionit. Kritika të veçanta kanë ardhur nga opozita, e cila argumenton se rritja e ndihmës nuk do të ketë efektet e dëshiruara dhe se fondet mund të përdoren më mirë në fusha të tjera, siç janë programet për integrim dhe mbështetja sociale.

Ndërkohë, qytetarët suedezë dhe komunitetet e emigrantëve janë duke ndjekur me vëmendje zhvillimet, duke shpresuar për një zgjidhje që do të sjellë stabilitet dhe drejtësi në çështjet e emigracionit.