Shtatë të vdekur nga stuhitë në Francë dhe Zvicër

Të paktën 7 të vdekur nga stuhitë e furishme dhe reshjet e dendura që goditën Francën dhe Zvicrën, gjatë fundjavës. Tre persona, 70 dhe 80 vjeç vdiqën në rajonin verilindor në Francë, teksa një pemë u rrëzua mbi makinën me të cilën ata po udhëtonin. Në Zvicër, dy persona vdiqën pas shirave të rrëmbyeshëm që shkaktuan rrëshqitje të dheut në juglindje të shtetit, njoftuan autoritetet. Më pas policia njoftoi se zbuluan edhe trupat e pajetë të dy personave të tjerë. Sipas mediave lokale, dy nga viktimat ishin gra që ishin për pushime në Zvicër. Moti i keq, gjithashtu, ka lënë pa energji elektrike disa zona në Zvicër. Edhe javën e kaluar, Zvicra u përball me reshje shiu që lanë të vdekur një person dhe shkaktuan dëme materiale.