SHTOHEN AKUZAT NDAJ ILIR METËS. ISH DEPUTETI: META, I PËRFSHIRË NË NJË VRASJE

Shtohen akuzat ndaj ish presidentit të Shqipërisë, kreut të Partisë së Lirisë, Ilir Metës. Ish deputeti Halit Valteri, personi që bëri kallëzimin në SPAK ndaj Ilir Metës për çështjen e lobimeve dhe kontratave qindra miliona dollarësh në SHBA, deklaroi në televizionin A2 CNN, akuza se ish kreu i shtetit, Meta, është i përfshirë në një vrasje të bujshme në Lezhë. Valteri e cilëson Ilir Metën, si e keqja më e madhe e shqiptarëve. Ilir Meta, prej ditësh në burg, është i akuzuar për korrupsion, pastrim parash dhe pasuri të pa deklaruara.

HALIT VALTERI, ISH DEPUTET

“Ka kallëzime të tjera ku Ilir Metën e përfshijnë në vrasje sepse kanë dalë në biseda Sky ECC. Dalin përgjime për shuma të mëdha parash që janë marrë për të kryer një vrasje në Lezhë. Dhe gjurmimi i tyre lidhet me një vrasje të bujshme. Meta, i përfshirë drejtpërdrejtë. Ka mbajtur lidhje me krimin e organizuar, ka shantazhuar biznese dhe bashkëpunëtorë të tij ku i linte paratë”, u shpreh Valteri.