Suedia forcon luftën kundër mashtrimeve me SMS dhe telefonata nga 1 gushti 2026

Nga 1 gushti 2026, në Suedi do të hyjnë në fuqi rregulla të reja për të luftuar mashtrimet që kryhen përmes SMS-ve dhe thirrjeve telefonike.

Këto ndryshime vijnë si përgjigje ndaj numrit të madh të rasteve të mashtrimit, ku kriminelët përdorin numra telefoni, dërgues SMS-sh dhe shërbime të tjera të komunikimit elektronik për të mashtruar qytetarët dhe bizneset. Qëllimi i tyre është të marrin informacione të ndjeshme dhe më pas para.

Sipas ligjit të ri, operatorët e telekomunikacionit do të kenë një përgjegjësi më të qartë për të ndaluar telefonatat dhe mesazhet e dyshimta përpara se ato të arrijnë te marrësi.

“Ne e shohim legjislacionin e ri shumë pozitivisht. Ai na jep mjete më të qarta dhe fleksibilitet më të madh për t’u përballur me trendet e krimit që ndryshojnë me shpejtësi”, tha Jesper Simons, shef njësie në Zyrën Suedeze të Postës dhe Telekomunikacionit (PTS), në një njoftim për shtyp.

Autoritetet suedeze shpjegojnë se modelet jonormale të trafikut mund të jenë një shenjë e mashtrimit të dyshuar. Kjo mund të përfshijë dërgimin e sasive të mëdha të SMS-ve, modele të pazakonta të trafikut ose sinjale të tjera teknike që mund të lidhin një telefonatë ose mesazh me veprimtari kriminale.

Sipas rregullave të reja, fokusi do të jetë te teknologjia dhe mënyra se si përdoren shërbimet e komunikimit në mashtrime. Faktori vendimtar nuk do të jetë përmbajtja e SMS-së ose ajo që thuhet gjatë një telefonate. Vlerësimi do të bazohet te të dhënat e trafikut dhe treguesit teknikë, gjë që, sipas PTS-së, u mundëson operatorëve të veprojnë më herët për të bllokuar mashtrimet.

Si të mbroheni nga mashtrimet
Policia këshillon qytetarët të tregohen të kujdesshëm dhe të ndjekin këto masa mbrojtëse:

• Mos jepni kurrë të dhënat e kartës së kreditit ose të bankës, si dhe informacione të tjera personale.

• Jini të dyshimtë nëse merrni një email ose SMS që ju kërkon të klikoni në një lidhje dhe të jepni informacione të ndjeshme, si kode sigurie apo të dhëna personale. Mos ndiqni kurrë udhëzime të tilla. Asnjë bankë apo kompani serioze nuk kërkon këto informacione në këtë mënyrë. Nëse keni dyshime, kontaktoni drejtpërdrejt bankën ose kompaninë.

• Përdorni fjalëkalime unike për shërbimet tuaja më të rëndësishme, si emaili, banka dhe identifikimi elektronik (e-ID).

• Mos lejoni kurrë askënd të marrë kontrollin nga distanca të kompjuterit ose telefonit tuaj.

Përgatiti në Shqip: Informacion për Suedin

Burimi: Policia Suedeze, Nyheter24