Zelensky: Ukraina gati për një marrëveshje sigurie me SHBA

Presidenti i Ukrainës, Volodymyr Zelensky, ka konfirmuar gatishmërinë e vendit të tij për të nënshkruar një marrëveshje sigurie me Shtetet e Bashkuara. Deklarata e tij erdhi pas një takimi me të dërguarin e posaçëm të Shtëpisë së Bardhë për Ukrainën, Keith Kellogg.

Në një postim në rrjetin social X, Zelensky tha se bisedimet me emisarin amerikan ishin konstruktive dhe përfshinë disa çështje kyçe, si situata në vijat e frontit dhe mundësitë për investime dhe bashkëpunim në fushën e sigurisë.

“Ukraina është e gatshme për një marrëveshje të fortë dhe efektive,” shkroi ai, duke theksuar rëndësinë e mbështetjes amerikane në këtë fazë kritike të luftës kundër agresionit rus.

Presidenti ukrainas shprehu gjithashtu mirënjohjen e tij për ndihmën dhe përkrahjen e vazhdueshme nga SHBA.

Bisedimet për një marrëveshje sigurie mes dy vendeve po zhvillohen në një kohë kur Ukraina po përballet me sfida të mëdha ushtarake dhe ekonomike. Një marrëveshje e tillë mund të forcojë më tej lidhjet mes Kievit dhe Uashingtonit, duke ofruar garanci shtesë për sigurinë dhe stabilitetin e Ukrainës.