20 mijë apartamente bosh në Suedi, mungojnë në total 110 mijë banesa

Në Suedi ka mbi 20 mijë apartamente me qira që janë bosh, edhe pse shumë njerëz kanë nevojë për strehim. Sipas televizionit SVT, numri i apartamenteve të lira dhe të gatshme për banim është rritur me 60% që nga viti 2022.

Në të njëjtën kohë, në gjithë vendin mungojnë rreth 110 mijë banesa. Ola Palmgren, nënkryetar i Shoqatës së Qiramarrësve, thotë se problemi është se këto apartamente të reja janë shumë të shtrenjta për shumicën e njerëzve.

“Kjo është një humbje e madhe dhe një shpenzim i çmendur”, thotë Palmgren.

Ministri i Strehimit, Andreas Carlson nga Partia Demokristiane, mendon se situata mund të përmirësohet me kohë.

“ Kur zonat e reja të ndërtohen dhe zhvillohen më shumë, ndoshta do të ketë më shumë njerëz që duan të jetojnë atje”, thotë ai.