7 data të rëndësishme para prillit 2026 që nuk duhet t’i harroni

Pranvera e vitit 2026 po afron dhe bashkë me të vijnë disa data shumë të rëndësishme që prekin shumë banorë të Suedisë. Këto data lidhen me deklarimin e taksave, rimbursimin e parave, udhëtimet, ndryshimin e orës dhe rregullat e qarkullimit rrugor. Ja çfarë duhet të dini, të shpjeguara me fjalë të thjeshta.

Deklarata e taksave dhe paratë

Kutia postare digjitale – afati i fundit 1 mars 2026

Nëse dëshironi ta merrni deklaratën e taksave në mënyrë digjitale dhe më herët se me postë, duhet të keni një kuti postare digjitale më së voni deri më 1 mars 2026. Nëse nuk e keni deri në këtë datë, deklarata do t’ju vijë automatikisht në letër, edhe nëse e krijoni kutinë digjitale më vonë.

Sipas Johan Schauman, ekspert i deklaratave në Skatteverket, gabimi më i zakonshëm është se njerëzit nuk e krijojnë kutinë digjitale në kohë.

Ai shpjegon se nëse nuk keni kuti digjitale në momentin kur Skatteverket fillon dërgimin e deklaratave, ato dërgohen në letër. Megjithatë, pavarësisht kësaj, gjithmonë do të ketë një kopje të deklaratës në “Mina sidor” pasi të përfundojë dërgimi, por shumë njerëz duan ta shohin deklaratën sa më herët në kutinë e tyre digjitale dhe jo në faqen e Skatteverket.

Deklarimi hapet më 17 mars 2026

Shërbimi elektronik i Skatteverket për Inkomstdeklaration 1 hapet më 17 mars 2026.

Kjo do të thotë se mund të deklaroni menjëherë, edhe nëse nuk e keni marrë ende deklaratën në postë. Të gjithë ata që kanë identitet elektronik mund ta përdorin shërbimin që nga dita e parë, pavarësisht nëse kanë apo jo kuti postare digjitale.

Rimbursimi i hershëm i taksave, vetëm pa ndryshime.

Nëse dëshironi të merrni vendimin përfundimtar të taksave dhe rimbursimin e mundshëm të parave tashmë në prill, duhet ta miratoni deklaratën më së voni më 31 mars 2026, pa bërë asnjë ndryshim.

Edhe shtesat ose bashkëngjitjet konsiderohen si ndryshime nga Skatteverket.

Sipas Schauman, vetëm ata që miratojnë të dhënat e paraplotësuara mund të marrin rimbursim të hershëm. Nëse keni shitje aksionesh, zbritje personale apo ndonjë informacion tjetër që duhet shtuar ose ndryshuar, do ta merrni vendimin përfundimtar dhe rimbursimin e mundshëm më 9–12 qershor.

Ora dhe ndërrimini i gomave

Ora kalon në orën verore më 29 mars 2026

Natën mes të shtunës dhe të dielës, më 29 mars 2026, ora zhvendoset një orë përpara dhe Suedia kalon në orën verore.

Kjo është e rëndësishme për ata që kanë fluturime të hershme, udhëtime me tren apo turne pune, pasi një gabim me orën mund të shkaktojë probleme. Këshillohet të kontrolloni oraret dhe aktivitetet para fundjavës.

Gomat e dimrit mund të kërkohen ende më 31 mars

Shumë njerëz mendojnë se gomat e dimrit nuk nevojiten më pas një date të caktuar, por në Suedi rregullat varen nga gjendja e rrugëve.

Nga 1 dhjetori deri më 31 mars duhet të keni goma dimri nëse ka kushte dimërore në rrugë, sipas Transportstyrelsen.

Kjo do të thotë se edhe më 31 mars mund të jetë e detyrueshme të përdorni goma dimri, nëse ka borë dhe akull. Nëse rrugët janë të thata dhe pa rrezik, zakonisht mund të kaloni në goma vere kur periudha po mbaron.

Udhëtimet jashtë vendit

Leja ETA për Mbretërinë e Bashkuar nga 25 shkurti 2026

Ata që planifikojnë të udhëtojnë në Mbretërinë e Bashkuar në mars 2026 duhet të kenë një Electronic Travel Authorisation (ETA) që nga 25 shkurti 2026.

Kjo leje kërkohet edhe për ata që më parë kanë udhëtuar pa pengesa. Pa ETA, mund t’ju refuzohet udhëtimi që në aeroport, para se të hipni në avion.

Sistemi i ri kufitar i BE-së – EES

Bashkimi Evropian po vendos një sistem të ri për hyrje dhe dalje, të quajtur Entry/Exit System (EES). Ky sistem po zbatohet gradualisht dhe duhet të jetë plotësisht funksional më së voni më 10 prill 2026.

Sistemi do të thotë më shumë regjistrim digjital në disa kufij të jashtëm të BE-së, veçanërisht për udhëtarët që nuk janë shtetas të BE-së ose zonës Shengen.

Për ata që udhëtojnë në fillim të prillit 2026, kjo mund të sjellë radhë më të gjata dhe pritje më të gjatë në kufi, prandaj rekomandohet të planifikoni më shumë kohë për udhëtimin.

Përmbledhje: Datat kryesore para prillit 2026

• 25 shkurt 2026 – ETA mund të kërkohet për udhëtime në Mbretërinë e Bashkuar
• 1 mars 2026 – Afati i fundit për kuti postare digjitale për deklaratën
• 17 mars 2026 – Hapet shërbimi i deklarimit
• 29 mars 2026 – Kalimi në orën verore
• 31 mars 2026 – Afati i fundit për miratim pa ndryshime për rimbursim të hershëm
• 31 mars 2026 – Gomat e dimrit kërkohen nëse ka kushte dimërore
• 10 prill 2026 – Sistemi EES i BE-së duhet të jetë plotësisht i zbatuar

Burimi: Nyheter24, Skatteverket, Transportstyrelsen, GOV.UK, Bashkimi Europian

Link: https://nyheter24.se/nyheter/inrikes/1453946-7-viktiga-datum-du-bor-ha-koll-pa-innan-april-2026