70 mijë qiraxhinj në Stokholm, përplasja për qiratë shkon tek ndërmjetësi.

Negociatat për qiratë e rreth 70 mijë apartamenteve në Stokholm kanë ngecur. Shoqata e Qiramarrësve kërkon ulje të qirave, ndërsa Shoqata e Pronave këmbëngul për rritje. Tani çështja është dërguar tek një ndërmjetës.

“Llogaritjet tona janë të drejta dhe të arsyeshme”, thotë Veronica Eriksson, përgjegjëse për negociatat tek Shoqata e Qiramarrësve.

Palët nuk bien dakord

Sipas Shoqatës së Pronave, kërkesa për ulje qirash është e papranueshme.

“Kërkesa është e jashtëzakonshme. Modeli ynë i përbashkët trepalësh tregon qartë se qiratë duhet të rriten për të mbuluar rritjen e madhe të kostove vitet e fundit”, shpjegon Nathalie Brard, shefe e negociatave tek Shoqata e Pronave.

Ajo shton se vendimi për të kërkuar ndërmjetës nuk do të thotë fund i bisedimeve:

“Ne e mbajmë derën hapur nëse Shoqata e Qiramarrësve ndryshon qëndrim dhe vjen me zgjidhje të reja.”

Qiramarrësit: pronarët janë kompensuar mjaftueshëm

Nga ana tjetër, Veronica Eriksson thekson se rritjet e qirave kanë qenë më të larta se rritjet e pagave, gjë që e ka rënduar situatën e banorëve.

Ajo i referohet edhe raportit të SCB-së (Byroja Suedeze e Statistikave), i cili tregon se kostot e menaxhimit të pasurive janë ulur gjatë tre viteve të fundit.

“Banorët ndodhen në një situatë të vështirë, ndërsa pronarët kanë marrë më shumë kompensim se sa duhet. Prandaj kërkesa jonë është e drejtë”, thotë ajo.

Për të tretin vit radhazi tek ndërmjetësi

Kjo është hera e tretë me radhë që negociatat përfundojnë tek ndërmjetësi.

“Ne mendojmë se kjo është një strategji për të shmangur dialogun. Ndërmjetësi duhet përdorur vetëm kur nuk ka asnjë zgjidhje tjetër”, thotë Eriksson.

Por Nathalie Brard kundërshton:

“Kur Shoqata e Qiramarrësve del nga modeli i përbashkët dhe kërkon ulje të pajustifikueshme, atëherë bëhet e pamundur të gjejmë zgjidhje me negociata. Për këtë arsye jemi detyruar t’i drejtohemi ndërmjetësit.”

Burimi: Mitt