700 mijë suedezë në varfëri, alarm para Krishtlindjeve

Gjendja ekonomike e shumë familjeve në Suedi po përkeqësohet gjithnjë e më shumë. Sipas një njoftimi të ri, më shumë njerëz se kurrë më parë janë goditur rëndë nga varfëria dhe vështirësitë financiare.

Sekretari i përgjithshëm i Sveriges Stadsmissioner, Jonas Rydberg, thotë për TV4 se organizatat ndihmëse po përballen me një situatë jashtëzakonisht të rëndë këtë vit.

“Vetëm këtë vit jemi pothuajse të mbingarkuar nga gjithë kjo varfëri dhe nga pyetje si: nuk kam ku të jetoj, nuk kam para, nuk kam dhurata për Krishtlindje. Më ndihmoni”, thotë ai.

Numri është dyfishuar në tre vjet

Misionet urbane në të gjithë vendin nuk kanë pasur kurrë më parë një fluks kaq të madh kërkesash për ndihmë para Krishtlindjeve sa këtë vit.

Sivjet, 700 mijë persona jetojnë në varfëri sociale dhe materiale në Suedi. Ky numër është dyfishuar krahasuar me tre vite më parë. Ndihmë kërkojnë të rinj, familje me fëmijë dhe persona të moshuar.

Rënia ekonomike dhe inflacioni kanë goditur rëndë shumë familje, sidomos ato që nuk kanë pasur rezerva financiare.

“Janë grupe krejtësisht të reja, por edhe njerëz që kthehen për ndihmë vit pas viti. Një situatë e tillë nuk duhet të ekzistojë në këtë vend”, thotë Jonas Rydberg.

Kërkohet politikë e veçantë kundër varfërisë

Sveriges Stadsmissioner kërkon tani që Suedia të ketë një politikë të qartë dhe të përbashkët kundër varfërisë, për të ndalur këtë zhvillim negativ.

Sipas një raporti të organizatës, sot nuk ekziston një politikë e unifikuar kundër varfërisë në Suedi. Për shumë vite, mungesa e kësaj politike ka ardhur sepse vendimmarrësit politikë nuk e kanë konsideruar varfërinë si një problem të madh.

Kjo ka qenë për shkak të situatës së mirë ekonomike që Suedia ka pasur për gati 30 vjet. Por rënia aktuale ekonomike, rritja e papunësisë dhe çmimet e larta të ushqimeve kanë rritur varfërinë. Po ashtu, kushtet më të ashpra për ndihmën ekonomike dhe fakti që shumë njerëz nuk marrin ndihmën që u takon, e kanë përkeqësuar situatën, thuhet në raport.

Fakte: Sveriges Stadsmissioner

• Sveriges Stadsmissioner është një organizatë ombrellë për misionet urbane lokale në Suedi.
• Organizata punon për të luftuar varfërinë dhe pastrehësinë.

Ndihma ofrohet përmes mbështetjes urgjente dhe afatgjatë, si ushqim, strehim, këshillim dhe komunitet për njerëzit në vështirësi sociale.

Burimi: Sveriges Stadsmissioner