97% e shoferëve në Stokholm paguajnë më shumë për parkimin

Pothuajse të gjithë shoferët që parkojnë në qytetin e Stokholmit paguajnë tarifa shtesë, edhe pse komuna premtoi se shërbimet e parkimit do të ishin pa kosto shtesë. Ky është bilanci pas një viti me përdorimin e aplikacioneve private për parkim.

Nga aplikacioni i qytetit te kompanitë private

Në fund të shtatorit 2024, qyteti i Stokholmit hoqi aplikacionin e vet Betala P. Pas kësaj, shoferët duhet të zgjedhin mes katër aplikacioneve private që kanë marrëveshje me qytetin: Easypark, Epark, Mobill dhe Parkster.

Premtimi i autoriteteve ishte që të gjitha kompanitë të ofronin një zgjidhje pa tarifë shtesë. Por kritikat erdhën shpejt. Shumë shoferë thanë se ishte e vështirë të shmangeshin kostot shtesë  sidomos tek Easypark, ku opsioni falas ekziston vetëm përmes faqes së internetit, ndërsa aplikacioni gjithmonë vendos tarifë shtesë.

Easypark dominon dhe 97% paguajnë shtesë

Easypark është kompania më e madhe. Afërsisht 80% e të gjitha parkimeve në qytet bëhen përmes tyre dhe pothuajse të gjithë paguajnë tarifën shtesë.

Nga tetori 2024 deri në qershor 2025, 97% e parkimeve në rrugë përmes Easypark janë bërë me pagesë shtesë: ose 15% e çmimit të parkimit, ose një tarifë mujore prej 49 kronash.

Parkster, aplikacioni i dytë më i madh, merr 5 krona për shërbime shtesë. Vetëm 30% e përdoruesve të tij e kanë paguar këtë tarifë gjatë së njëjtës periudhë.

Miliona në tarifa shtesë

Sipas qytetit, një parkim mesatar kushton 40 krona. Bazuar në këtë, kompanitë kanë fituar dhjetëra miliona nga tarifat shtesë që prej fillimit të sistemit të ri por komuna nuk e di saktë shumën.

“Shoferët bëjnë një zgjedhje të vetëdijshme”

Këshilltari i trafikut, Lars Strömgren (MP), thotë se sistemi funksionon siç ishte menduar:

“Më e rëndësishmja është që konsumatorët të kenë informacion për të bërë një zgjedhje të vetëdijshme. Shumica e dinë që Easypark ka opsion falas përmes faqes së internetit, por gjithsesi zgjedhin aplikacionin. Kush nuk do të paguajë, mund të zgjedhë një aktor tjetër.”

Kur u pyet nëse ishte qëllimi që pothuajse të gjithë të paguajnë shtesë, Strömgren tha:

“Ne nuk kishim ndonjë mendim për këtë. Përparësia e sistemit është që kompanitë kanë arsye të përmirësojnë shërbimin e tyre.”

Easypark: “Çështje ekonomike”

Shefi i Easypark për Suedinë, Gustaf Lartén, thotë se klientët zgjedhin të paguajnë për shërbime premium dhe se aplikacionet private kishin tashmë 65% të tregut para se të mbyllej Betala P.

Ai shpjegon pse shërbimi falas ofrohet vetëm online:

“Qyteti ishte i gatshëm të na paguante 40–60 öre për çdo parkim. Që biznesi ynë të funksiononte, na duhej ta vendosnim opsionin falas vetëm në versionin web.”

Sipas tij, përfitimet nga digjitalizimi janë të mëdha:

“Sot njerëzit paguajnë siç duhet si kurrë më parë. Vetëm në qendër të Stokholmit, gjobat për parkim kanë rënë me 44% në dhjetë vitet e fundit. Është e lehtë të krijohet një pasqyrë e shtrembër, por ne u kursejmë njerëzve gjoba të panevojshme.”

Më pak ankesa nga qytetarët

Sipas Strömgren, numri i ankesave nga banorët ka rënë gjatë vitit të fundit:

“Aplikacioni Betala P kishte disa vite mbi supe dhe shumë probleme teknike. Alternativa do të ishte një aplikacion i ri nga qyteti, por kjo do të financohej nga taksat. Me sistemin e ri krijohet konkurrencë mes kompanive, sigurohet zhvillim teknologjik dhe nuk ngarkohet qyteti. Ky ishte opsioni më i mençur.”

Çfarë thonë shoferët?

Alex Bergendorff Ramirez, 35 vjeç, Johanneshov:

– “Është një rrëmujë e madhe. Përdor kryesisht Easypark dhe e hap direkt aplikacionin, sepse nuk kam nerva të merrem me opsione. Është absurde që njerëzit mund të paguajnë më shumë pa dashur. Ishte më mirë kur qyteti kishte aplikacionin e vet.”

Katër kompani me marrëveshje me qytetin

Që nga 30 shtatori 2024, parkimi në Stokholm paguhet vetëm përmes kompanive që kanë marrëveshje me qytetin:

• Easypark
• Epark
• Mobill
• Parkster

Parkster dhe Epark ofrojnë parkim pa tarifa shtesë në aplikacionet e tyre.

Easypark dhe Mobill e ofrojnë këtë vetëm përmes shërbimeve online.

Burimi: Mitt