Rekord në mbijetesën nga arrestet kardiake në Suedi gjatë 2023

Numri i suedezëve që mbijetuan nga arresti kardiak arriti nivel rekord gjatë vitit 2023, me 12.4% të të prekurve që arritën të shpëtonin, sipas të dhënave të Regjistrit Suedez për Ndihmën e Parë të Zemrës dhe Mushkërive. Ky është një përmirësim i dukshëm krahasuar me vitin 2000, kur vetëm 4% mbijetonin, raporton Vetenskapsradion në SR.

Sipas ekspertëve, ky përmirësim mund t’i atribuohet faktit që gjithnjë e më shumë njerëz janë të trajnuar në ndihmën e parë për zemrën dhe mushkëritë (HLR). Megjithatë, sfida kryesore mbetet disponueshmëria e pajisjeve për defibrilim.

Pajisje të padukshme

Jacob Hollenberg, drejtues i kërkimeve në Qendrën për Studimin e Arresteve Kardiake në Institutin Karolinska, thekson se, ndonëse Suedia ka shumë pajisje për defibrilim, ato nuk janë gjithmonë lehtësisht të qasshme.

“Pajisjet duhet të jenë më të dukshme dhe të aksesueshme 24 orë në ditë, gjatë gjithë javës, që njerëzit t’i përdorin kur ndodhin emergjenca,” tha Hollenberg për radion.

Kjo thirrje për veprim vjen në një kohë kur përmirësimi i qasjes ndaj këtyre pajisjeve mund të luajë një rol jetik në rritjen e mëtejshme të numrit të të mbijetuarve.