Rënie e cmimeve të banesave në Suedi. Stokholmi dhe veriu i vendit preken më shumë.

Çmimet e banesave në Suedi pësuan një rënie prej 0.9%  në muajin tetor, sipas një raporti nga SBAB dhe Booli. Rajonet më të prekura ishin Stokholmi i Madh dhe pjesa veriore e Suedisë, ku çmimet e vilave ranë ndjeshëm, me 3.7% në Stokholm dhe 3.3% në veri.

Krye-ekonomisti i bankës shtetërore, Robert Boije, shprehet se rënia e theksuar e çmimeve në Stokholm ishte e papritur. “Fakti që çmimet e vilave në Stokholm po bien me këtë ritëm është disi befasues,” tha Boije për agjencinë TT, duke sugjeruar një situatë më komplekse në tregun e banesave në kryeqytet.

Në veriun e Suedisë, Boije përmend se “problemet me fabrikat e baterive dhe faktorë të tjerë” mund të kenë ndikuar në këtë ulje të çmimeve. Kjo lidhet me vështirësitë e kohëve të fundit në projektet industriale të rajonit.

Ndërkohë, edhe çmimet e apartamenteve kanë rënë, kryesisht në jug të Suedisë dhe në rajonin e Göteborg, me një rënie prej mbi 2%.

Megjithatë, pavarësisht rënies në tetor, çmimet e përgjithshme të banesave janë ende 6.2% më të larta krahasuar me fillimin e vitit, ndërsa rritja e korrigjuar për efektet sezonale ishte 0.6% në tetor.