Zgjatet afati për vaksinën falas kundër HPV-së: Synimi është zhdukja e kancerit të qafës së mitrës

Qeveria suedeze ka vendosur të zgjasë deri në verë afatin për vaksinimin falas kundër virusit HPV për gratë e lindura midis viteve 1994–1999. Ky vendim vjen si pjesë e një projekti kombëtar me synim zhdukjen e kancerit të qafës së mitrës deri në vitin 2027. Për ta arritur këtë qëllim, është thelbësore që të paktën 70% e grave midis moshës 25 dhe 30 vjeç të vaksinohen.

Sipas Joakim Dillner, studiues kryesor në Institutin Karolinska, interesi për vaksinimin është rritur ndjeshëm gjatë javëve të fundit. “Ka pasur një vërshim në qendrat e vaksinimit, prandaj ndërprerja e programit tani do të ishte e papërshtatshme,” tha Dillner për agjencinë TT.

Fillimisht, ishte planifikuar që vaksinimi falas të përfundonte në fund të këtij viti. Megjithatë, rajonet që nuk e kanë arritur ende objektivin e vaksinimit do të kenë mundësi të vazhdojnë me programin edhe për gjashtë muaj të tjerë.

Kujtojmë se që nga viti 2021, Suedia ka qenë në ballë të përpjekjeve për të zhdukur kancerin e qafës së mitrës përmes një strategjie të kombinuar: vaksinimi masiv dhe skriningu i hershëm.

Kjo zgjatje është një mundësi e fundit për gratë që i përkasin grupmoshës përfituese, duke qenë se vaksina mbetet një nga mjetet më të rëndësishme për parandalimin e kësaj sëmundjeje serioze.