Hapet linja kombëtare për ndihmë ndaj problemeve të shëndetit mendor. Shërbimi do të jetë i hapur 24 orë, çdo ditë të javës.

Që nga e enjtja, qytetarët në Suedi kanë një linjë kombëtare të re për ndihmë ndaj problemeve të shëndetit mendor. Linja, e hapur 24 orë në ditë, është menduar si një mbështetje për ata që përballen me vështirësi të rënda emocionale ose mendore. Raporton TT.

“Fatkeqësisht, shohim një nevojë të madhe për ndihmë kur jeta bëhet më e errët,” tha ministri i çështjeve sociale, Jakob Forssmed (KD), duke theksuar rëndësinë e këtij shërbimi për qytetarët më në nevojë.

Shërbimi ofron mbështetje nga profesionistë të kualifikuar si psikologë, infermierë dhe këshilltarë socialë. Ndihma mund të kërkohet përmes telefonit ose internetit, dhe të gjitha kontaktet mund të mbeten anonime, përfshirë ato të familjarëve të personave në vështirësi.

Linja operohet nga Rajoni i Stokholmit përmes njësisë Estöd, ndërsa qeveria ka ndarë një buxhet prej 22 milionë kronash për ta mbështetur këtë iniciativë. Synimi është që shërbimi të bëhet një pjesë e përhershme e sistemit të kujdesit ndaj shëndetit mendor në vend.

Kjo është një përpjekje e re për të luftuar problemet në rritje të shëndetit mendor dhe për të ofruar një shpëtim për ata që kanë më shumë nevojë.