Ministri Bohlin për reshjet e borës: “Duhet të jemi të përgatitur për t’u kujdesur për veten”

Ministri i Mbrojtjes Civile, Carl-Oskar Bohlin (M), u bën thirrje qytetarëve që të planifikojnë me kujdes dhe të ndjekin udhëzimet e autoriteteve përpara reshjeve të mëdha të borës që priten të godasin vendin duke filluar nga e hëna.

“Planifikimi është i domosdoshëm. Çdokush që nuk përgatitet rrezikon të rëndojë mbi burimet e autoriteteve,” deklaroi Bohlin për Aftonbladet.

Ai shtoi: “Mbi të gjitha, duhet të jemi të përgatitur për të përballuar kushtet e motit dhe për të qenë në gjendje të kujdesemi për veten, edhe nëse trafiku bllokohet.”

Gjendje gatishmërie

Autoriteti Suedez i Transportit, Trafikverket, ka hyrë në gjendje stabsläge (gatishmërie) si masë paraprake. Kjo vjen pasi Instituti Suedez i Meteorologjisë dhe Hidrologjisë (SMHI) ka lëshuar disa paralajmërime për reshje të dendura dëbore, që do të përfshijnë një pjesë të madhe të vendit.

Autoritetet këshillojnë qytetarët të shmangin udhëtimet e panevojshme dhe të jenë të përgatitur për kushte të vështira në rrugë. Në shumë zona, stuhitë e dëborës mund të shkaktojnë vonesa të gjata dhe ndërprerje në transport.

Kujdes dhe përgjegjësi

Bohlin theksoi rëndësinë e një qasjeje të matur dhe të përgjegjshme nga qytetarët gjatë situatës së krijuar. “Kjo është një situatë ku secili prej nesh ka një rol për të luajtur. Dëgjoni këshillat dhe përgatituni mirë,” përfundoi ai.