Suedi: Pesë profesione ku është më e lehtë të gjesh punë. Situata e rëndë ekonomike ka rritur papunësinë, por disa sektorë ofrojnë mundësi të mira punësimi.

Papunësia në Suedi ka arritur nivele të larta për shkak të sfidave ekonomike të viteve të fundit. Në dhjetor 2024, rreth 376,517 persona ishin të regjistruar si të papunë, duke përbërë 7.1% të forcës punëtore. Situata është e vështirë për shumë, por disa profesione vazhdojnë të ofrojnë shanse të mira për punësim.

Sektori i automjeteve: Mekanikë dhe shoferë autobusi

Një nga sektorët me kërkesë të lartë është ai i automjeteve. Sipas një raporti të publikuar nga faqja Framtid, profesione si mekanik i makinave dhe shofer i autobusit janë ndër ato ku është më e lehtë të gjesh punë. Ky trend është veçanërisht inkurajues për ata që kanë interes në industrinë e automjeteve dhe transportit.

Mundësi në sektorin e shëndetësisë

Sektori i shëndetësisë vazhdon të vuajë nga mungesa e fuqisë punëtore. Punë si infermier për ambulanca, asistent personal, dhe socionom janë ndër profesionet ku kërkesa për punonjës mbetet e lartë.

Papunësia në rritje: Një pasqyrë e situatës

Numri i të papunëve të regjistruar u rrit me rreth 23,000 persona gjatë vitit 2024, sipas të dhënave nga Arbetsförmedlingen. Mesatarisht, 357,000 persona ishin të regjistruar si të papunë gjatë vitit të kaluar, një rritje e dukshme nga mesatarja prej 334,000 në vitin 2023.

– “Papunësia është rritur në mënyrë të gjerë në të gjitha grupet: gra, burra, të rinj dhe të moshuar, si dhe të lindur brenda dhe jashtë vendit,” deklaroi Eva Samakovlis, drejtoreshë e analizës në Arbetsförmedlingen.

Rënia ekonomike ndikon tregun e punës

Gjendja ekonomike e dobët ka ndikuar negativisht tregun e punës. Numri i vendeve të reja të punës ka rënë ndjeshëm, gjë që reflektohet në statistikat e regjistrimeve të reja në Platsbanken, platforma kryesore për shpalljet e vendeve të punës.

Ekonomistët shpresojnë se ulja e normave të interesit mund të ndihmojë në përmirësimin e ekonomisë dhe në hapjen e më shumë mundësive për punësim në të ardhmen e afërt.

Burimi: Framtid, Arbetsförmedlingen