Trump shpreh zhgënjim për ankesat e Ukrainës pas bisedimeve mes SHBA dhe Rusisë

Presidenti i SHBA-së, Donald Trump, shfaqi zhgënjim për reagimin e Ukrainës pas bisedimeve të zhvilluara mes SHBA-së dhe Rusisë për të gjetur një zgjidhje të mundshme për luftën në Ukrainë. Trump u shpreh se ishte “i zhgënjyer” nga ankesa e ukrainasve për faktin që nuk janë ftuar në bisedimet e drejtuara nga Shtetet e Bashkuara dhe Rusia.

“Unë jam shumë i zhgënjyer, dëgjoj që ata janë të zemëruar që nuk kanë një vend, por ata kanë pasur një vend për tre vjet dhe një kohë të gjatë para kësaj,” tha Trump gjatë një konferencë për shtyp në rezidencën e tij në Mar-a-Lago, Florida, ku po fliste për takimin e zhvilluar mes SHBA dhe Rusisë në Arabinë Saudite.

Në përgjigje të pyetjes se çfarë do të thoshte ai për ukrainasit që ndihen të “tradhtuar”, Trump theksoi se ai kishte besim se kishte forcën dhe mundësinë për të mbyllur luftën. “Unë mendoj se kam forcën për ta mbyllur këtë luftë,” u shpreh ai, duke shtuar se ishte “shumë më i sigurt” për një marrëveshje me Rusinë pas bisedimeve të zhvilluara më 13 shkurt.

Për më tepër, Trump u shpreh se SHBA-ja nuk kishte asnjë kundërshtim ndaj mundësisë së dërgimit të forcave paqeruajtëse evropiane në Ukrainë, një çështje që është diskutuar gjithashtu në një samit të papritur të liderëve evropianë në Paris. “Nëse ata duan ta bëjnë këtë, është në rregull,” tha Trump. Ai gjithashtu përmendi se Franca dhe disa shtete të tjera, përfshirë Britaninë e Madhe, kanë ngritur idenë për dërgimin e këtyre forcave paqeruajtëse dhe e quajti këtë një “gjest të bukur”.

Ky diskutim vjen në një kohë kur Ukraina vazhdon të kërkojë mbështetje ndërkombëtare më të madhe dhe një vend në tryezën e bisedimeve që po ndodhin për të arritur një zgjidhje përfundimtare për luftën e vazhdueshme me Rusinë.