Konflikt për multikulturalizmin – Åkesson kundërshton ministrin e Migracionit

Debati për multikulturalizmin ka shpërthyer mes qeverisë dhe Demokratëve të Suedisë (SD), pasi ministri i Migracionit, Johan Forssell (M), deklaroi në një intervistë për Aftonbladet se “Suedi do të jetë një shoqëri multikulturore”.

Deklarata ka nxitur një reagim të ashpër nga lideri i SD, Jimmie Åkesson, i cili e cilëson këtë qasje si të gabuar dhe të rrezikshme.

“Më duket e habitshme dhe shqetësuese që ministri i Migracionit shprehet në këtë mënyrë. Përmes marrëveshjes sonë me qeverinë, kemi arritur të bindim Moderatët për reforma kyçe në politikën e emigracionit dhe integrimit. Prandaj, është e pamatur të dorëzohemi përballë multikulturalizmit,” shkruan Åkesson në X.

Më tej, ai shton: “Besoja sinqerisht se kishim ecur përpara dhe se kjo ideologji e dëmshme ishte hedhur në koshin e plehrave të historisë. Kushdo mund të shohë se çfarë ka ndodhur me vendin tonë! Suedia nuk duhet të jetë multikulturore. Suedia duhet të jetë Suedia.”

Ky debat vjen në një kohë kur qeveria dhe SD kanë bashkëpunuar ngushtë për të ashpërsuar politikat e migracionit, por përplasja mbi multikulturalizmin tregon se nuk ka një konsensus të plotë mbi drejtimin që duhet të marrë vendi.