Suedia dhe Italia në marrëveshje të re për emigracionin

Suedia dhe Italia kanë arritur një marrëveshje të re për bashkëpunim në çështjet e emigracionit. Lajmin e konfirmoi kryeministri suedez Ulf Kristersson, i cili njoftoi se Suedia do të marrë pjesë në iniciativën italiane të quajtur “Procesi i Romës”.

Sipas Kristersson, ai dhe kryeministrja italiane Giorgia Meloni ndajnë të njëjtin qëndrim për menaxhimin e emigracionit të parregullt në Evropë. Ata e konsiderojnë “të papranueshme” që vetëm rreth 20% e personave të dëbuar nga BE-ja të largohen realisht nga unioni.

“Si Suedia ashtu edhe Italia po përballen me pasojat e emigracionit të madh të parregullt. Prandaj, po ndryshojmë politikën tonë dhe po punojmë që BE-ja të marrë masa më të forta,” deklaroi Kristersson.

Italia, e cila ka qenë një nga vendet më të prekura nga valët e emigrantëve në Mesdhe, ka shtyrë përpara “Procesin e Romës” si një strategji për të forcuar kthimet dhe për të rritur bashkëpunimin me vendet e origjinës së emigrantëve. Me përfshirjen e Suedisë, ky plan pritet të marrë një mbështetje më të gjerë brenda BE-së.

Zyrtarët e të dyja vendeve nuk kanë dhënë ende detaje konkrete mbi hapat e ardhshëm të bashkëpunimit, por sinjalizojnë se synimi është forcimi i politikave të kthimit dhe kontrolli më i rreptë i kufijve.