Postnord paralajmëron për valë të re mashtrimesh me SMS

Postnord ka ngritur alarmin për një valë të re mesazhesh mashtruese që pretendojnë se një paketë ka mbërritur në depo dhe duhet të tërhiqet. Qytetarët këshillohen të jenë të kujdesshëm dhe të mos bien pre e këtyre mesazheve që synojnë t’i mashtrojnë përmes lidhjeve të rreme.

“Anders Porelius, zëdhënësi i Postnord, i këshillon qytetarët që të kontrollojnë me kujdes përmbajtjen e mesazheve. “Zakonisht, mesazhet janë me gabime drejtshkrimore ose përmbajnë diçka të dyshimtë që bie në sy kur e shikon me vëmendje,” tha ai.

Rritje e madhe e mashtrimeve

Sipas Porelius, sulmet e tilla mashtruese ndodhin në mënyrë periodike gjatë vitit, por aktualisht ka një rritje të konsiderueshme të numrit të mesazheve të dërguara.

“Fatkeqësisht, ne nuk mund të përcaktojmë me saktësi se sa njerëz janë prekur, por raportimet që marrim nga qytetarët tregojnë se ka shumë mesazhe të tilla në qarkullim,” theksoi ai.

Si të mbroni veten?

Postnord rekomandon përdorimin e aplikacionit të saj zyrtar për të kontrolluar çdo dërgesë të mundshme. Sipas Porelius, aplikacioni garanton që informacionet e sakta të dërgesave të shfaqen vetëm aty, duke shmangur kështu çdo rrezik për mashtrim.

“Mesazhet e sakta nga Postnord vijnë gjithmonë nga burime të besueshme. Përdorimi i aplikacionit tonë është mënyra më e mirë për të qenë të sigurt,” tha ai.

Paralajmërimi i Policisë

Edhe Policia ka bërë thirrje për kujdes të shtuar. Në një deklaratë zyrtare, ata këshillojnë qytetarët të mos klikojnë në lidhje të panjohura, të mos përgjigjen në mesazhe të dyshimta dhe të mos telefonojnë numra të panjohur, përveç nëse e dinë që është një kontakt i besuar.

Postnord dhe Policia nxisin qytetarët të raportojnë çdo mesazh të dyshimtë dhe të qëndrojnë të vëmendshëm ndaj përpjekjeve për mashtrim.

Burimi: Expressen