Moderatët në Stokholm: Të ndalen ndërtimet e reja të xhamive

Partia Moderata në Stokholm kërkon që ndërtimi i dy xhamive të reja në lagjet Skärholmen dhe Rinkeby të ndalet. Ata janë të shqetësuar për financimin e mundshëm nga grupe ekstremiste.

“Nuk dua më shumë xhami që financohen nga ekstremistë”, tha Christofer Fjellner, përfaqësues i opozitës në bashkinë e Stokholmit.

Xhamia në Rinkeby ka pasur leje për ndërtim që nga viti 2010, por ende nuk është ndërtuar. Tani leja ka skaduar dhe Moderatët nuk duan që ajo të rinovohet. Ata propozojnë që toka të përdoret për qëllime të tjera.

Fjellner thotë se nuk dihet se kush e financon këtë projekt dhe për këtë arsye ndërtimi duhet të ndalet derisa të ketë rregulla të qarta për financimet nga jashtë.

Ka pasur kritika edhe më parë për ndërtimin e xhamive në Suedi me para nga vende si Irani, Katari dhe Arabia Saudite.

I pyetur nëse kjo është shkelje e lirisë fetare, Fjellner tha se secili ka të drejtë të besojë në çfarë të dojë, por se Suedia nuk është e detyruar të lejojë që organizata ekstremiste të ndërtojnë objekte fetare.

Moderatët kërkojnë që edhe ndërtimi i planifikuar i xhamisë në Skärholmen të ndalet.

Ndërkohë, qeveria suedeze po punon për një hetim të ri që do të shqyrtojë nëse duhet ndaluar financimi i huaj i bashkësive fetare. Fjellner dëshiron që edhe ndërtimet që janë në proces të ndalen nëse financohen nga jashtë.

Burimi: Expressen