Säpo: Rreziku nga terrorismi ulet, por kujdesi duhet të vazhdojë

Shërbimi i Sigurisë Suedeze (Säpo) njoftoi se niveli i kërcënimit terrorist në Suedi është ulur. Ai kaloi nga niveli 4 në nivelin 3, në një nivel prej pesë shkallësh. Kjo do të thotë se kërcënimi nuk është më “shumë i lartë”, por ende është “i rritur”.

Shefja e Säpo-s, Charlotte von Essen, tha se rreziku për sulme nga ekstremistët e dhunshëm është më i ulët se më parë. Ajo tregoi se propaganda që e paraqiste Suedinë si një vend kundër Islamit është dobësuar dhe tani Suedia shihet thjesht si pjesë e Perëndimit.

“E kemi parë këtë ndryshim prej disa kohësh dhe besojmë se situata është bërë më e qëndrueshme,” tha ajo.

Megjithatë, ajo paralajmëroi se kjo nuk do të thotë që rreziku ka kaluar plotësisht. “Ende mund të ndodhë një sulm terrorist, ndaj puna për sigurinë duhet të vazhdojë,” theksoi von Essen.

Säpo e kishte rritur nivelin e kërcënimit në gusht të vitit 2023, pas një rritjeje të tensioneve dhe kërcënimeve. Tani, situata duket më e qetë, por autoritetet mbeten vigjilente.