Kryetari i BRF: Duhet t’u jepet mundësia banorëve të blejnë tokën ku jetojnë

Johan Kanmert, kryetar i një shoqërie banesore (BRF) në Göteborg, ka kërkuar në një shkrim për gazetën Svenska Dagbladet që shteti dhe komunat të japin më shumë mundësi për blerjen e tokës nga banorët që jetojnë në banesa kolektive.

Sipas tij, shumë shoqëri banesore nuk janë pronare të tokës ku janë ndërtuar banesat, por e marrin me qira nga komuna përmes një sistemi të quajtur tomträtt. Ky sistem ka qenë i dobishëm dikur, sepse lejonte ndërtimin pa pasur shumë para, por tani është bërë barrë për banorët.

Çdo disa vjet, komuna e rinegocion qiranë e tokës dhe shpesh ajo rritet me qindra përqind, gjë që e bën jetesën më të shtrenjtë për shumë familje.

“Ky sistem po i vë nën presion ekonomik shumë banorë dhe po shton ndarjen mes atyre që kanë mundësi financiare dhe atyre që nuk kanë,” thotë Kanmert. Ai kërkon që shoqërive banesore t’u jepet mundësia të blejnë tokën, në mënyrë që të kenë më shumë siguri dhe kontroll mbi të ardhmen e tyre.