Zbulohet skandali: Pothuajse i gjithë mjalti i importuar në Suedi është i falsifikuar. Vetëm 4 nga 40 kavanozë përmbanin mjaltë të vërtetë.

Një hetim i ri në Suedi ka zbuluar se shumica e mjaltit të importuar që shitet në dyqanet ushqimore nuk është fare mjaltë i vërtetë.

Bletarët suedezë, me ndihmën e një metode të re për testimin e ADN-së, kontrolluan 40 lloje të ndryshme mjalti. Vetëm katër prej tyre ishin mjaltë natyral, i prodhuar në Suedi. Pjesa tjetër, 36 kavanozë, përmbanin kryesisht sheqer dhe lëndë të tjera artificiale.

“Kemi dyshuar prej kohësh për këtë mashtrim, por tani u konfirmua se situata është shumë më e rëndë nga sa mendonim,” tha Yngve Kihlberg, kryetar i Shoqatës së Bletarëve në Suedi.

Sipas bletarëve, mjalti i rremë vjen kryesisht nga Kina, ku prodhuesit kanë mësuar si ta mashtrojnë sistemin e kontrollit. Ata përziejnë sheqer dhe shurup në vend të mjaltit natyral, por e bëjnë në mënyrë të tillë që testet e zakonshme nuk e zbulojnë dot mashtrimin.

Bletarët suedezë kërkojnë tani që autoritetet të marrin masa më të rrepta për kontrollin e produkteve të importuara dhe të mbrojnë konsumatorët nga produktet e falsifikuara.