QEVERIA KRITIKOHET NGA KOMISIONI KUSHTETUES. DEKLARATA PËR SHTETËSINË NË SHKELJE TË RREGULLAVE.

Tre ministra të rëndësishëm të qeverisë suedeze janë kritikuar nga Komisioni Kushtetues i parlamentit (KU), për një deklaratë të bërë mbi dhënien e shtetësisë. Bëhet fjalë për Kryeministrin Ulf Kristersson, Zëvendëskryeministren Ebba Busch dhe Ministrin e Punës Johan Pehrson.

Në një artikull të botuar në gazetën Dagens Nyheter këtë dimër, ata thanë se edhe para se ligji i ri për shtetësinë të miratohet, duhet të veprohet për të ndaluar dhënien e shtetësive sipas ligjit aktual. Kjo është parë si ndërhyrje në punën e autoriteteve, gjë që ndalohet nga rregullat suedeze për ndarjen e pushteteve.

Deputetja e Partisë së Gjelbër, Annika Hirvonen, e cila bëri ankesën ndaj ministrave, shprehet e kënaqur me vendimin e Komisionit Kushtetues.

“Kjo është një nga ndërhyrjet më serioze që kemi parë nga një qeveri në punët që duhet t’i kryejnë institucionet e pavarura”, tha Hirvonen për Dagens ETC.

Komisioni Kushtetues nuk jep dënime, por kritika të tilla janë një sinjal i fortë për shkelje të rregullave demokratike.