Paralajmërime të reja për reshje të rrëmbyeshme në pjesë të mëdha të Suedisë

Instituti Suedez i Meteorologjisë dhe Hidrologjisë (SMHI) ka lëshuar disa paralajmërime të reja të verdha për reshje të dendura shiu, që pritet të prekin pjesë të mëdha të vendit, shkruan institucioni në faqen e tij zyrtare.

Paralajmërimet vlejnë për pjesë të mëdha të Norrlandit jugor, skajin jugor të Västerbotten-it, Götaland-in si dhe zonat e brendshme të Svealand-it.

Stuhia pritet të fillojë sot nga ora 13:00 dhe të zgjasë deri në orën 21:00. Në disa zona mund të bjerë shi shumë i dendur, me sasi prej 30 deri në 50 milimetra, gjë që mund të shkaktojë përmbytje.

“Rrugët dhe nënkalimet mund të përmbyten, shmangni udhëtimin nëpër grumbullime uji”, paralajmëron SMHI.

Ndërkohë, në pjesët më veriore të vendit vazhdon të vlejë paralajmërimi portokalli për temperatura shumë të larta.