Swish paralajmëron përdoruesit: aplikacione të rreme po mashtrojnë qytetarët

Shërbimi i pagesave Swish ka dalë me një paralajmërim të rëndësishëm për të gjithë përdoruesit, pasi janë zbuluar aplikacione të rreme që imitojnë Swish për të kryer mashtrime.

Aplikacione të rreme që duken si origjinali

Në disa qytete, mes tyre edhe Norrköping, është vërejtur një trend ku mashtruesit përdorin aplikacione që ngjajnë me Swish.

Këto aplikacione tregojnë sikur një pagesë është kryer, ndërkohë që në realitet asnjë para nuk është transferuar.

Thirrja e Swish për tregtarët dhe individët

Swish thotë se e sheh këtë fenomen shumë seriozisht dhe u bën thirrje të gjithë përdoruesve të jenë të kujdesshëm.

Për tregtarët, rekomandohet përdorimi i aplikacionit të biznesit Swish, integrimi i tij direkt në arkë ose kontrolli i pagesave në llogarinë bankare.

Për individët, mënyra më e sigurt është të kontrollojnë historikun e pagesave në aplikacionin zyrtar Swish ose të verifikojnë llogarinë e tyre bankare.

Këtë e ka sqaruar për Nyheter24 përfaqësuesja e Swish, Jenny Ragnartz.

Tregtarët viktima të mashtrimit

Organizata Svensk Handel ka marrë raportime të shumta për raste të ngjashme.

Sipas tyre, mashtruesit kanë tentuar të blejnë mallra duke treguar në telefon atë që duket si një pagesë e kryer me Swish.

Madje edhe detajet grafike, si efekti me fishekzjarrë në ekran pas një pagese  janë kopjuar.

Vetëm më vonë, shpesh gjatë mbylljes së ditës, tregtarët zbulojnë se paratë nuk kanë hyrë fare në llogari.

Policia: “Aplikacionet e rreme janë shumë të besueshme”

Edhe policia suedeze ka ngritur alarmin për këtë problem.

Jan Olsson, komisar në Qendrën Kombëtare të Krimeve Kibernetike, ka deklaruar se aplikacionet e rreme të Swish janë “absolutisht reale në pamje”.

Duhet të kontrollojmë gjithmonë vetë në telefonin tonë nëse pagesa ka mbërritur në llogari. Është një gjë shumë e thjeshtë, ka thënë ai për TV4.

Luftë e vazhdueshme kundër mashtruesve

Swish bashkëpunon vazhdimisht me bankat për të rritur sigurinë e shërbimit, por mashtruesit gjejnë vazhdimisht metoda të reja për të mashtruar njerëzit dhe bizneset.