Pastruesit në Arlanda gjejnë dosjen e qeverisë për NATO

Një dosje me dokumente të lidhura me anëtarësimin e Suedisë në NATO është harruar në aeroportin Arlanda nga një zyrtar i qeverisë dhe është gjetur nga një pastrues në tualetin e aeroportit. Lajmi është zbuluar nga gazeta Dagens Nyheter.

Sipas gazetës, dosja përmbante informacione për bisedimet e Suedisë me Turqinë lidhur me kërkesën për anëtarësim në NATO. Ngjarja ka ndodhur në nëntor 2022. Dosja ishte një kopje e materialeve që kryeministri Ulf Kristersson kishte me vete gjatë udhëtimit të tij në Turqi.

Kancelaria e qeverisë ka pranuar se dosja u harrua dhe u gjet nga stafi i aeroportit. Megjithatë, zëdhënësi i qeverisë thekson se dokumentet nuk kishin të dhëna të klasifikuara që lidhen me sigurinë kombëtare. Për këtë arsye nuk u bë një vlerësim për dëmet dhe ngjarja nuk iu raportua Shërbimit të Sigurisë (Säpo).