Mijëra persona në Suedi nuk e dinë se vuajnë nga tensioni i lartë i gjakut

Tensioni i lartë i gjakut është faktori më i madh i rrezikut për vdekje të parakohshme. Sipas mjekëve, gati tre milionë suedezë kanë tension më të lartë se norma, por gjysma e tyre nuk janë të vetëdijshëm për këtë.

“Po të arrinim të zbulonim më shumë raste në kohë, çdo vit do të shpëtonim 30 mijë njerëz nga infarkti, goditja në tru dhe dështimi i zemrës,” thotë kardiologu Mattias Brunström.

Sëmundje pa simptoma

Hipertensioni shpesh nuk jep asnjë shenjë. Vetëm në raste shumë të rënda shfaqen dhimbje koke, turbullim i shikimit apo lodhje. Një studim i Federatës Suedeze të Zemrës dhe Mushkërive tregon se një në tre suedezë nuk e di fare se çfarë tensioni ka.

Mattias Brunström, docent në epidemiologji në Universitetin e Umeås dhe kryetar i grupit kombëtar për hipertensionin, thotë se kjo duhet të ndryshojë:

“Duhet të identifikojmë më shumë persona që kanë nevojë për diagnozë, por që nuk janë zbuluar ende.”

Rregulla të reja në Suedi

Këtë vjeshtë do të hyjnë në fuqi udhëzime të reja për trajtimin e tensionit. Objektivi i uljes së tij do të ndryshojë nga 140/90 mmHg në 130/80 mmHg.

“Ne nuk po ndryshojmë kufirin se çfarë konsiderohet tension i lartë, por trajtimi duhet ta ulë tensionin më shumë se më parë,” sqaron Brunström.

Një tjetër risi është se mjekët këshillohen të përdorin menjëherë dy ilaçe për të ulur më shpejt tensionin. Gjithashtu, personat me vlera mes 120–139/70–89 duhet të kontrollohen rregullisht.

Shkaku kryesor i vdekjeve

Hipertensioni është shkaktari më i madh i vdekjeve të parakohshme, si në Suedi, ashtu edhe në mbarë botën.

“Suedia është prapa vendeve të tjera perëndimore. Shumë pacientë janë të patrajtuar ose të trajtuar dobët,” thotë Brunström.

Më shumë se dy milionë persona në vend kanë tension të lartë të patrajtuar ose trajtim jo të mjaftueshëm. Një arsye është mungesa e mjekëve të kujdesit parësor, të cilët janë ata që zbulojnë më shpesh tensionin e lartë.

Duhet matur rregullisht

Problemi kryesor është se tensioni i lartë nuk jep simptoma. “Duhet matur për ta zbuluar. Në udhëzimet e reja rekomandohet matja e tensionit tek të gjithë personat mbi 50 vjeç,” thekson Brunström.

Matja mund të bëhet edhe në shtëpi, por nëse tensioni është mbi 140/90 duhet kontaktuar menjëherë mjeku.

Në SHBA këshillohet që matjet të nisin që në moshën 18 vjeç, pasi është rritur numri i të rinjve me hipertension. I njëjti trend po shihet edhe në Suedi: rreth 10% e të rinjve të rritur kanë sot tension të lartë, shpesh për shkak të mbipeshës.

“Unë mendoj se çdo i rritur duhet ta masë të paktën një herë tensionin e tij,” përfundon Brunström.

Burimi: SVD