Rregull i ri për bashkimin familjar. Dy vjet qëndrim përpara se të sillni familjen në Suedi.

Një hetim i ri, i cili sot i dorëzohet ministrit të emigracionit Johan Forssell (M), propozon që personat të kenë jetuar në Suedi të paktën dy vjet përpara se të mund të aplikojnë për të sjellë familjarët e tyre. Ky konsiderohet ndryshimi më i madh në propozim, shkruan gazeta Svenska Dagbladet.

Hetimi ka vazhduar për rreth një vit dhe tani i dorëzohet ministrit Forssell. Qeveria, përmes Maria Malmer Stenergard që e nisi procesin, ka theksuar se synimi është të ashpërsohen rregullat.

Me rregullin e ri, duhet të keni jetuar dy vjet në Suedi përpara se të kërkoni leje qëndrimi për familjarët tuaj. Deri tani nuk ka ekzistuar një kërkesë e tillë. Përveç kësaj, priten edhe rregulla më të forta për kushtet e mbajtjes me shpenzime të veta, por detajet e plota ende nuk janë bërë publike.

Sipas qeverisë, qëllimi është që rregullat të përputhen me standardet minimale të BE-së dhe të ndihmohet integrimi në Suedi.

Në fakt, gjatë vitit 2024, bashkimi familjar ishte forma më e madhe e emigracionit drejt Suedisë  me gati 45 mijë persona, pothuajse dyfish më shumë se ata që erdhën për punë, rreth 27 mijë.

Burimi: SVD