Propozimi i plotë: Qeveria suedeze propozon rregulla më të ashpra për bashkimin familjar

Qeveria e Suedisë ka në plan të vendosë kushte më të rrepta për bashkimin familjar. Të premten u paraqit një raport që ka qenë në punë që prej vitit 2024, ku propozohet mes të tjerash që personat me leje qëndrimi të përkohshme të jetojnë të paktën dy vjet në vend, përpara se të sjellin familjen e tyre. Po ashtu, raporti sugjeron që kërkesa për të ardhura të mjaftueshme (kriteri i mirëmbajtjes ekonomike) të kontrollohet jo vetëm kur merret vendimi i parë, por edhe çdo herë që leja e qëndrimit shtyhet.

“Ne duhet të kemi pritshmëri të larta ndaj atyre që emigrojnë në Suedi”, tha ministri i Migracionit Johan Forssell (Moderaterna).

Përshtatje me rregullat e BE-së

Raporti iu dorëzua qeverisë nga hetuesja e posaçme Ingrid Utne, e cila theksoi se qëllimi ka qenë përshtatja e ligjeve suedeze me minimumin e kërkuar nga Bashkimi Europian dhe Konventa Europiane për të Drejtat e Njeriut.

Kusht i ri për dy vite qëndrim

Sipas raportit, kushdo me leje qëndrimi të përkohshme duhet të jetojë në Suedi të paktën dy vjet përpara se të mund të aplikojë për bashkim familjar. Qëllimi, sipas Forssell, është që bashkimi të ndodhë vetëm në kushte të mira.

Lejet e qëndrimit për fëmijët

Një rregull i ri do të prekë edhe fëmijët. Në të ardhmen, leja e qëndrimit për një fëmijë do të jepet vetëm nëse prindi që jeton në Suedi është kujdestari i tij ligjor. Kjo do të thotë se e drejta për bashkim familjar do të kufizohet tek familja bërthamë, përveç rasteve ku e kërkon drejtpërdrejt ligji i BE-së.

Kontroll i vazhdueshëm i të ardhurave

Sipas Ingrid Utne, kërkesa për të ardhura të mjaftueshme do të rivlerësohet sa herë që bëhet kërkesë për zgjatjen e lejes së qëndrimit. Në këto raste, do të merren parasysh edhe të ardhurat e anëtarëve të familjes.

Ministri Forssell e quajti këtë propozim shumë të rëndësishëm:

“Kështu mund të kontrollohet disa herë nëse të ardhurat e deklaruara janë të vërteta, nëse ende ekzistojnë dhe nëse mjaftojnë për të mbajtur familjen. Nëse jo, leja e qëndrimit mund të mos vazhdojë më”, tha ai.

Refuzim në raste të dhunës

Raporti gjithashtu propozon që të zgjerohet mundësia për të refuzuar leje qëndrimi. Kjo do të zbatohet, për shembull, për ata persona që më herët kanë ushtruar dhunë ose kanë bërë shkelje të rënda ndaj partnerit apo anëtarëve të tjerë të familjes.

Kur hyjnë në fuqi ndryshimet?

Raporti propozon që ndryshimet ligjore të hyjnë në fuqi më 1 janar 2027.