Jugu i Suedisë rrezikon rritje çmimesh pas vendimit të Norvegjisë për energjinë me cmime fikse.

Nga 1 tetori, familjet në Norvegji do të kenë mundësinë të lidhin kontrata me çmim fiks për energjinë elektrike 40 öre për çdo kilovat-orë. Ky sistem, i quajtur tashmë “çmimet norvegjeze”, pritet të rrisë konsumin e energjisë dhe të ndikojë në ngritjen e çmimeve edhe në vendet fqinje, sidomos në Suedinë jugore.

Eksperti i tregut të energjisë në kompaninë Bixia, Johan Sigvardsson, shpjegon se modeli i ri do të heqë çdo arsye që konsumatorët të kursejnë energji apo të zhvendosin përdorimin e tyre në orare të tjera.

“Nxitja për të kursyer ose për të përdorur energjinë në orë të ndryshme zhduket plotësisht”, tha ai për agjencinë TT.

Edhe analisti tjetër i energjisë, Mats Nilsson, docent në Universitetin Södertörn, paralajmëron për pasoja serioze.

“Kur konsumi nuk bie edhe pse çmimet janë të larta, përkundrazi rritet kërkesa dhe si rezultat ngrihen çmimet në të gjithë tregun nordik,” shkruan ai në një koment për agjencinë e lajmeve.