Rregulli i ri në Suedi: Punonjësit do të mund të shohin pagën e kolegëve

Nga 1 qershori 2026, në tregun e punës në Suedi do të hyjë në fuqi një ligj i ri për transparencën e pagave.

Ky ligj do t’u japë të drejtë punonjësve të kërkojnë informacion për pagat mesatare të kolegëve të tyre, të ndara sipas gjinisë.

Sipas direktivës së re, punëdhënësit do të jenë të detyruar të tregojnë pagën fillestare, kriteret e pagesës, nivelet e pagave dhe zhvillimin e tyre që në fillim ose në fazat e para të një procesi punësimi.

Gjithashtu, nuk do t’u lejohet punëdhënësve të pyesin kandidatët për pagën që kanë pasur më parë, dhe as t’i ndalojnë punonjësit të flasin hapur për pagën e tyre me të tjerët.

Ekspertja: Punonjësit janë fituesit, punëdhënësit humbësit

Anita Rae, drejtuese e tregut të punës në faqen e punësimit Jobbland, thotë se ky ligj i ri do të përfitojë punonjësit, ndërsa punëdhënësit do ta kenë më të vështirë.

Në një intervistë për gazetën Göteborgs-Posten (GP), ajo shpjegon se punëdhënësit kanë pasur gjithmonë më shumë informacion se punonjësit, por kjo do të ndryshojë me rregullat e reja.

“Mund të lindin vështirësi nëse pagat nuk janë të barabarta në vendin e punës. Shumë kompani kanë sistem individual pagash dhe dallimet mund të vijnë nga përvoja ose aftësia për të negociuar,”  shpjegon Rae.

Sipas saj, punëdhënësit tani do të duhet të justifikojnë dhe shpjegojnë çdo dallim page, gjë që mund të jetë e vështirë për shumë kompani.

Pesë këshilla nga Jobbland për të përballuar transparencën e pagave

1. Mos u shqetësoni për krahasimet.
   Është normale të pyesni veten “A fitojnë të tjerët më shumë apo më pak se unë?”. Transparenca e pagave duhet parë si një masë pozitive dhe afatgjatë, që sjell më shumë qartësi dhe siguri në vendin e punës.
2. Informohuni për pagat në sektorin tuaj.
   Përdorni statistika dhe rrjetet profesionale për të kuptuar nivelin standard të pagës në profesionin tuaj. Kjo ju ndihmon të argumentoni më mirë nëse mendoni se paga juaj nuk është e drejtë.
3. Përgatituni më mirë për bisedat e pagës.
   Me më shumë informacion, ju do të keni fuqi më të madhe negociuese për të kërkuar pagë më të lartë ose kushte më të mira pune.
4. Më shumë barazi në vendin e punës.
   Kur pagat janë transparente, bëhet më e vështirë të justifikohen dallime për shkak të gjinisë, moshës apo arsyeve të tjera që nuk kanë lidhje me meritat.
   Kjo çon në më shumë drejtësi dhe barazi mes punonjësve.
5. Kënaqësi më e madhe në punë.
   Një kulturë e hapur për pagat rrit besimin dhe transparencën. Kur e njihni strukturën e pagave, ndiheni më të informuar dhe më të sigurt në punën tuaj.

Sipas ekspertëve, transparenca e pagave mund të ndryshojë rrënjësisht mënyrën se si zhvillohet tregu i punës në Suedi.

Qëllimi i ligjit është të ulë pabarazitë gjinore dhe të forcojë pozitën e punonjësve në negociatat për pagat.