Partia e Mjedisit “Miljöpartiet” denoncon ministrat për skandalin e Somalisë

Partia e Mjedisit “Miljöpartiet”  ka bërë një ankesë në Komisionin e Parlamentit (KU) kundër ministrit të Migracionit, Johan Forssell (M), dhe ministrit të Ndihmës, Benjamin Dousa (M), raporton gazeta DN.

Ky hap vjen pas zbulimit të javës së kaluar nga Ekot, sipas të cilit qeveria ka riorientuar në fshehtësi fonde ndihme për projekte pranë qeverisë somaleze. Kjo është bërë në këmbim që Somalia të pranojë qytetarët që janë deportuar nga Suedia.

Zëdhënësja e politikës së ndihmës e Partisë së Mjedisit, Janine Alm Ericsson, tha për gazetën se informacioni që ka dalë është serioz dhe se veprimet e ministrave duhet të shqyrtohen.

“Ka arsye për të besuar se ka pasur drejtim të papërshtatshëm të autoritetit dhe është dhënë informacion mashtrues,” tha ajo.

Nga ana e tij, Benjamin Dousa i tha Omni se ai dhe qeveria nuk kanë asgjë për të fshehur. Ai shtoi se politika e ndihmës e koalicionit Tidöpartierna ka bërë që Suedia të rrisë kthimin e personave drejt Somalisë.