Gjigandët e ushqimeve që ka rritur më shumë çmimet, Willys del në krye.

Zinxhirët suedezë të supermarketeve pritet të jenë nën vëzhgim muajt e ardhshëm.

Këtë e bën të ditur organizata e pavarur Matpriskollen, duke iu referuar uljes së paralajmëruar të TVSH-së për ushqimet, që pritet të hyjë në fuqi këtë pranverë.

Por edhe përpara kësaj mase, tregu suedez i ushqimeve po përballet me sfida të reja.

Në raportin e fundit të Matpriskollen thuhet se rritja e përgjithshme e çmimeve të ushqimeve në shtator ishte e vogël, por ndryshimet midis produkteve dhe zinxhirëve të marketeve janë të mëdha.

Një zinxhir ushqimor ka rritur çmimet më shumë se të tjerët është Willys.

“Willys pati një rritje prej 0,6% në shtator, ndërsa Ica Maxi vetëm 0,1%. Do të jetë interesante të shihet si do të veprojnë në vazhdim. Kjo tregon se presioni për rritje çmimesh është më i madh se sa duket në shifra,” thotë Ulf Mazur, drejtor dhe themelues i Matpriskollen.

Willys ndryshon çmimet më shpejt

Ky rezultat mund të duket i papritur, pasi Willys është cilësuar disa herë si supermarketi më i lirë në Suedi, për herë të fundit gjatë verës.

Sipas Ulf Mazur, arsyeja është se Willys ndryshon çmimet më shpejt se konkurrentët e tij, ndërsa të tjerët reagojnë më ngadalë.

“Nëse zinxhirët e tjerë nuk i rrisin çmimet, Willys i ul menjëherë. Këtë e pamë edhe dimrin e kaluar, kur Ica nuk i rriti çmimet dhe Willys bashkë me City Gross i ulën ato,” thotë Mazur.

Rritje e madhe e çmimeve të mishit të grirë

Një tjetër pjesë që bie në sy në raportin e shtatorit është rritja e madhe e çmimeve të mishit të viçit dhe mishit të grirë.

Mishi i grirë i importuar është shtrenjtuar deri në 50% brenda një viti, ndërsa në përgjithësi çmimi i mishit të grirë është rritur me 13%.

Sipas Mazur, mungesa e mishit suedez të viçit është shqetësuese dhe kërkon masa afatshkurtra dhe afatgjata për ta zgjidhur.

Si pasojë e rritjes së çmimeve, shitjet e mishit të grirë kanë rënë ndjeshëm.

Sipas një studimi nga YouGov, shitjet kanë rënë me 31% gjatë vitit të fundit.

“Kjo tregon qartë se konsumatorët po ndryshojnë mënyrën e blerjes kur çmimet rriten shumë në disa produkte. Ndërsa çmimi i mishit të grirë është rritur me një të pestën, mishi i grirë i pulës është bërë pak më i lirë,” shpjegon Charlotte Alring, drejtuese e biznesit në Dagligvarunytt.

Faktet: Ndryshimet e çmimeve në shtator

• Willys: +0,6 %
• ICA: +0,1 %
• City Gross: +0,1 %
• Coop: 0,0 %
• Hemköp: –0,1 %
  Totali: +2,2 %

Ndryshimet e çmimeve gjatë 12 muajve të fundit

• Coop: +3,6 %
• Willys: +2,9 %
• Hemköp: +2,8 %
• ICA: +1,8 %
• City Gross: +0,1 %
  Totali: +2,2 %

Burimi: Matpriskollen