Forssell për kërcënimin e opozitës: Jam gati të tregoj si punojmë

Ministri suedez i Migracionit, Johan Forssell (Moderaterna), ka reaguar pas kërcënimit të Socialdemokratëve dhe Partisë së Majtë për ta raportuar atë në Komisionin Kushtetues (KU), për shkak të parave që Suedia ka paguar ndaj Somalisë.

Në një intervistë për TV4 Nyheterna, Forssell tha se nuk ka asgjë për të fshehur dhe se është i gatshëm të shkojë në parlament për të shpjeguar punën e tij.

“Unë shkoj me kënaqësi në Riksdag (parlament) për të treguar se si punojmë për të rritur kthimin e emigrantëve dhe për të siguruar që personat e dënuar për krime të rënda në Suedi të dëbohen,”  deklaroi ai.

Forssell shtoi se marrëveshja e Suedisë me Somalinë nuk është sekrete, por një pjesë e bashkëpunimit për emigracionin, i cili është publikuar hapur në faqen e qeverisë. Ai theksoi se Suedia ka marrëveshje të ngjashme edhe me disa vende të tjera.

Në një deklaratë për agjencinë TT, ministri e quajti bashkëpunimin me Somalinë “shumë të rëndësishëm”, sepse sipas tij, vetëm kështu Suedia mund të dëbojë kriminelë të rrezikshëm nga vendi.

Kritikat e opozitës

Opozita ka reaguar ashpër pas raportimeve se para suedeze janë përdorur për projekte dhe shërbime të lidhura me persona pranë kryeministrit të Somalisë.

Përfaqësuesi i Socialdemokratëve për politikë të jashtme, Morgan Johansson, e ka quajtur këtë marrëveshje “korruptive” dhe ka kërkuar hetim të plotë.

Çfarë përmban marrëveshja me Somalinë

• Në dhjetor 2023, qeveria suedeze nënshkroi një marrëveshje sekrete me Somalinë. Sipas saj, 100 milionë korona suedeze nga fondet e ndihmës u ridrejtuan për projekte në Somali, në këmbim që vendi afrikan të pranojë shtetasit e tij që dëbohen me forcë nga Suedia.
• Marrëveshja ka shkaktuar konflikte të brendshme në agjencinë suedeze të ndihmës Sida dhe në ambasadën suedeze në Somali. Si pasojë, shefi i ndihmës në ambasadë u dëbua, ndërsa qeveria dërgoi inspektorë për të hetuar situatën.
• Përveç kësaj, qeveria suedeze ka paguar 5 milionë korona përmes Ministrisë së Drejtësisë, për shërbime që kanë përfunduar tek të afërm të personave të lidhur me kryeministrin e Somalisë.
• Për këtë arsye, Socialdemokratët dhe Partia e Majtë kanë ankimuar këtë në Komisionin Kushtetues (KU) ministrin Johan Forssell.
• Partia e Gjelbër (Miljöpartiet) ka shkuar edhe më tej, duke akuzuar si Forssell, ashtu edhe ministrin e ndihmës, Benjamin Dousa.

Qeveria mbron marrëveshjen

Pavarësisht kritikave, qeveria dhe ministrat përgjegjës e kanë mbrojtur vendimin, duke thënë se qëllimi i pagesave ka qenë rritja e numrit të kthimeve të personave të dëbuar nga Suedia.

Ndërkohë, opozita kërkon transparencë të plotë dhe e cilëson marrëveshjen si një skandal që ngre dyshime për korrupsion.